Xurdida a partir da complexa xestión do programa da capitalidade europea no 2000, Incolsa pronto se especializou na atención turística. Como ‘Turismo de Santiago’ encárgase na actualidade da planificación, estruturación, comercialización e promoción do turismo na cidade, así como da vertebración de iniciativas mixtas no sector, nas que teñen cabida proxectos empresariais, cursos de mellora e plans que incorporan á poboación local.
Nesta tarefa de construír e comunicar a imaxe da cidade ante todos os públicos -os seus visitantes e os seus propios habitantes- Turismo de Santiago mantén permanente diálogo cos representantes do sector turístico local e autonómico; con outras institucións de promoción turística estatais, como
Turespaña, o
Grupo de Ciudades Patrimonio de la Humanidad, o grupo España Verde e a
Federación Española de Municipios y Provincias; e internacionais, como a
Organización Mundial del Turismo, a Rede de Ciudades Santas ou o grupo
European Cities Tourism.
